Kalaja e Vuçakut
Kalaja Dardane e fshatit Vuçak, 12 km në jugperëndim të Drenasit: gjetjet arkeologjike dëshmojnë jetë që nga neoliti.
Kalaja e Vuçakut ndodhet rreth 12 km në jugperëndim të Drenasit.
E vendosur në një lartësi mbidetare prej 940 m, Kështjella e Vuçakut zotëronte një pozicion të rëndësishëm gjeostrategjik, duke shërbyer edhe si urëlidhëse mes rrafshit të Dukagjinit dhe një pjese të madhe të rrafshit të Kosovës.
E ndërtuar mbi dy kreshta shkëmbore, Kalaja njihet nga banorët vendas si Gradina e madhe dhe Gradina e vogël.
Gjetja e artefakteve të ndryshme — enë tryeze, amfora transporti, balsamarium e të tjera — vetëm sa e ka shtuar misterin dhe kureshtjen mes banorëve. Edhe pse e njohur në literaturën arkeologjike që në vitet '80, vëmendjen e arkeologëve Kështjella e Vuçakut e tërhoqi vetëm në vitin 2017, kur u organizuan gërmimet e para arkeologjike nga Instituti Arkeologjik i Kosovës.
Gjetjet arkeologjike dëshmojnë se jeta në këtë Kala ka filluar që nga periudha e gurit (neoliti) dhe ka vazhduar edhe në periudhën e antikitetit të vonë e të mesjetës së hershme.
Vlerat e shumta arkeologjike dhe historike që i posedon kjo Kala, pozita e mirë gjeografike dhe një trashëgimi e pasur e evidentuar i bëjnë arkeologët të mendojnë se Kështjella e Vuçakut, në një perspektivë afatshkurtër, do të mund të shndërrohet në një nga atraksionet më të rëndësishme turistike për zonën.
